喺西甲爭取後上奪冠嘅皇家馬德里，上周六喺關鍵一役，竟然痛失兩分，只能主場2:2逼和華倫西亞，俾同日贏波嘅一哥巴塞隆拿拋開四分差距，即係話後者只要喺淨番嗰兩場攞到三分，就可以重奪西甲寶座，睇嚟皇馬要正式同西甲冠軍講拜拜喇！
周中撼祖記翻盤有困難
皇馬唔止西甲快玩完，歐聯都可能凍過水，因為卻奧斯喺今場傷出，雖然佢自稱無事，可以喺周三歐聯四強次回合主場對祖雲達斯上陣，但負傷上陣，首回合落後1:2嘅劣勢要翻盤相信都有困難。
皇馬喺西甲原本同巴塞只係差兩分，餘下賽程已經不容再失，點知上周六對住第四位嘅華倫西亞，喺上半場26分鐘已經先失兩球，之後C朗、巴利同查維亞靴南迪斯都試過中楣唔入，去到完半場前本來有機會追近，巴利博到12碼，但C朗操刀，被救12碼有一手嘅迪亞高艾維斯撲出，錯失良機，結果換邊後雖然靠比比嘅頭槌同艾斯高遠射，追成2:2，痛失兩分，目前36戰得86分排第二。
巴塞差三分即封王
正當皇馬頭頭碰着黑，巴塞就喺同日主場贏皇蘇2:0，錄得八連勝，同皇馬拉開四分差距，嚟緊兩場只要攞多三分就可以封王。今場尼馬仲射入加盟後嘅第50個入波為巴塞先開記錄，柏度洛迪古斯就射入球靚倒掛，助球隊鎖定勝局。
雖然皇馬失分，但教練安察洛堤就唔肯認輸，死撐話仲有機會捧走聯賽錦標，我求大俠勸佢唔好自欺欺人喇，專心博周中歐聯翻盤好過。不過，中場主將卻奧斯喺今仗上半場中段傷出，據聞係拉親後腿肌肉，雖然佢喺Instagram話自己周三趕得切復出鬥祖記，但狀態都成疑。莫迪歷一早打柴，搞到要將唔慣踢防中嘅沙治奧拉莫斯推上前，結果呢幾場都被批效果差，𠵱家卻奧斯有傷在身，一個唔好彩賽前都係話唔出得，由伊拿拉文迪或盧卡斯施華頂上，但出其中一個，同祖記嘅派路同維達爾拍埋，真係爭幾皮。
識睇，一定係睇足英台【英波Live】：
http://soccer.appledaily.com
http://bit.ly/engballlive