股評人陳永陸（陸叔）食正港股「大時代」氣勢，近期幫港產陀飛輪品牌「萬希泉」設計一款「牛錶」，限量生產200隻，估計兩至三星期市面有售。陸叔話，牛市賺錢就要回饋社會，所以每賣出一隻牛錶，佢就會捐出一定金額畀本地一間慈善機構，細節待定。
萬希泉創辦人沈慧林係一名80後，做投行出身，2010年借助爸爸喺杭州手錶廠嘅陀飛輪技術創辦公司，以低價吸客，相對外國知名品牌動輒過百萬元一隻陀飛輪，萬希泉幾萬銀就有交易，陸叔呢隻牛錶好似都係5萬銀樓下。
牛錶除咗有大大隻牛圖案代表牛市，仲有好似升市標誌嘅「12」。陸叔話，有80隻牛錶刻有佢簽名嘅零件，當中40隻附有編號，呢40隻已獲朋友訂購，佢留起咗隻代表佢自己嘅「6號」錶，打算遲啲公開慈善拍賣。