冠軍騎師潘頓做手術後復出，第二場贏完大熱沈廐「紅白」，第六場泥地三班一哩，以葉廐「好老友」爆冷添食，個人憑一對華倉馬連奪麥蘊利盃同李福深盃起孖，追番剛周三夜馬缺陣，「好事必得」換雷神建功冇咗一win條數。
「好老友」今場受惠於臨場落大雨，於濕滑場地上沿欄一放到底，在港累積三次贏馬，其中兩次都係由潘頓經手，人馬堪稱最佳拍檔。當中葉楚航上次日馬已有16倍「跑寶貝跑」勝出，加埋今場21倍「好老友」在內，變成一連兩次日賽都贏冷門，馬房有番氣勢。
反觀雷神今日唔知搞乜，跑到第六場完咗，都係第二冇馬贏，呢場佢接手賢廐「開心旅程」被捧成4倍大熱，沿途留放已經一絕，可惜追足半條直路，都係追唔到「好老友」，只能屈居亞軍，認真冇運。三、四名分別係「奪目商人」同「勁開心」，四重彩派76,462元。
雷神頭六場座騎「和諧氣氛」、「自動導航」、「加州卓越」、「多個世界」、「花紅」及「開心旅程」全部第二，可能係一項紀錄。