接拍廣告、主持電視魔術節目，33歲的甄澤權(Louis Yan)，人氣急升。5年間，由一腳踢窮到燶，到橫掃國際比賽獎項豬籠入水，一條成魔之路，有聲有色。但原來，點「叉燒飯成餐蛋麵」的魔法背後，成就奇蹟的，是不懂魔術的甄媽媽，「如果無佢支持，肯定無今日嘅我」。重提杯麵魔術穿崩小風波、談練習時燒燶屋頂瘀事，舞台上自信爆棚的大魔術師，坐在慈母身旁，瞬間轉移，變回靦腆大男生，毋需高八度問「點解嘅」，已夠神奇！
記者 呂麗嬋 攝影 黎樹雄
在銀行工作的甄媽媽，是出名的「愛子號」。每逢兒子有大型表演，她都親身現場打氣，風雨不改，「Louis以前未有自己工作室，成日喺屋企練魔術，嗰時我已經係佢嘅觀眾」。22歲當媽媽，與做中學校長的丈夫早年批離，Louis對下，還有個相差三歲的妹妹。少了爸爸的一個家，三缺一卻感情親蜜，甄媽媽記得，在浸大修讀市場推廣及傳訊的兒子，甫畢業，就與她談少男心事。
「佢話想試吓做全職魔術師，叫我俾2、3年時間佢，如果唔成功，會出去再揾工。聽到梗唔贊成，擔心佢揾唔到食，有幾多個大衛高柏飛？」滿肚疑問，看不透，滿以為兒子只鬧著玩，直至由大學宿舍搬回家住，終於親眼看到那團火，「晚晚喺屋企苦練，見過佢攞住本黃頁，逐個地址寄信介紹自己，爭取演出機會。以前佢做嘢無咩恆心，從無試過咁認真」。
由力勸前途為重穩陣為先，到變成「跟得阿媽」全力支持，這條在香港沒有多少前人可循的成魔之路，漫長又難行，「唔同會計師，考完個牌逐級上，條路好清楚；喺香港，大部分魔術師都係兼職，無人知條路應該點行先啱」。Louis苦笑。最初，他主力在晚宴爭取表演機會，又教魔術班幫補生活，「唔出名、無人識，收入好低，一個月試過只有二、三千，一定唔過萬」。
沒錢給家用，自給自足，是Louis的底線。「同屋企人住，唔使交租，食都係有限錢，至少屋企唔係靠我開飯，如果唔係，連行出第一步都無機會」。表演靠苦練，教班靠口碑，舞台下的魔術世界，沒有奇蹟。由婚宴到港孩生日會通殺，別人放假他返工，口耳相傳，工作越來越多，「捱咗頭2、3年，儲咗啲錢，由本地賽開始，表演俾魔術師睇，難度高先會進步」。
2010年，是他魔術師生涯的轉捩點。那一年，他自資出戰歐洲及美國的國際賽事，「兩個地方都係第一次去，上網揾資料，意大利太貴，唔夠錢；荷蘭唔俾玩火，最終去咗匈牙利」。一個人拖著行李，步出機場，無助手，盤川有限；加上白鴿不能帶出境，抵步先揾......初哥出征，志在參與，竟贏了冠軍！「外國人好熱情，欣賞你嘅表演，會過嚟讚你。有咩嘢工作自己做得開心，人哋又可以咁歡樂？」勝利的榮耀、舞台上的滿足感，讓他決心行得更遠。
人在異鄉，得獎後第一時間致電回港向媽媽報喜。「佢攞到獎梗開心，但其實我嗰時喺香港等，擔心到不得了。嗰年，歐洲一帶火山灰嚴重，影響航班，出發前我話咁危險不如唔好去，佢梗係唔肯聽......」兒子眼中的「報喜」，成了慈母多年未忘的「報平安」，冠軍？反而不太上心。往後橫掃魔術界奧斯卡梅林獎，甚至打破健力士紀錄，已是後話。「付出過努力，有成果就好，如果佢無嘢做，咪仲擔心」。甄媽媽很坦白。
完成電視節目，Louis透露將展開新一輪世界巡迴演出，「先上郵輪，之後會去加拿大及東南亞幾個國家」。由一腳踢到8人團隊，甚至擁有自己專業的道具師，今日的Louis，愈走愈遠，甄媽媽說要見寶貝仔一面，也不容易。周日母親節，他就說只會簡單食飯慶祝，「之前太忙，一家人坐低食飯傾吓計，已好難得」。沒有刀鋸美人、沒有漫天煙火，家常便飯，一樣笑得開懷，也許，這才是真正不能拆解的人間魔術吧？
穿崩風波 有撐有踩
在個個有手機、「人人係記者」的年代，連魔術師都要打醒12分精神！由小眾舞台到成為電視節目收視救星，成功「入屋」的甄澤權，人氣旺，但攀得越高、跌得也越痛，早前他走上街頭表演杯麵魔術，就被現場網友，以手機攝得有工作人員遞麵一幕，引發一場「被穿崩」的杯麵風波，他直言會引以為戒，「發生咗都要面對，最對唔住係嗰團隊，唯有下次做好啲」。
面對出道以來最大危機，在大學讀市場學的Louis學以致用，並無逃避，除了火速出聲明承認疏忽，未做好保護措施，讓有心人站在非觀賞位置拍攝，又重申肯定團隊的努力；甚至出席公開場合時，不怕崩口人忌崩口碗，重新表演同一魔術，化解危機。「其實都怕越描越黑，唯有今後少說話多做事，設計多啲好魔術最實際」。
他自言上了寶貴一課，不過這場茶杯裡的杯麵風波，在網上就引發罵戰。有網民看完影片後直斥「欺騙觀眾」，有人就為他抱不平，指「係人都知魔術係假，偷拍無意思」，如同去迪士尼樂園，硬要將分演米奇老鼠的藝人頭套除下，為摧毀神話而沾沾自喜，有點缺德。姑勿論是彈還是讚，這個極速上位的港產魔術師，都說會照單全收，有則改之。