這天主席賽馬日，十場都係盃賽，除了皇太后盃，清一色以馬會前主席命名。
第三場四班千四米蒲偉士碟，可以話係完美結局，事關現任馬會主席葉錫安博士，憑愛駒「藍雪山」大熱2.1倍奪魁，呢匹六歲馬夥拍韋達後上一攻而破，大勝兩身位，無驚無險地補中，馬兒剛好相隔兩年才重開勝門。
另一高手莫雷拉繼續做阿二，繼頭兩場「和諧氣氛」、「自動導航」屈居亞軍後，第三場雷神接手東廐「加州卓越」後上同「藍雪山」串Q，雷神與告東尼季內四次沙田合作兩冠一亞一殿，都算交足功課。蘇狄雄騎「沙角威龍」後上第三，梁家俊操刀之「鼓浪花園」得殿軍，四重彩派九千六百幾。
「藍雪山」臨尾落飛甚勁至2.1倍大熱門，幕後似信心十足，但馬主葉鍚安卻自爆說：「『藍雪山』在主席賽馬日上陣，並非刻意安排，我已很久未捧過盃，今場馬兒取勝完全是個大驚喜。此馬熱至2.1倍，捧場客比我更有信心，賽前我估計牠應有四、五倍，我自己一蚊都冇投注落此駒身上，不過牠取勝我仍非常開心。」