近一年各國央行都有一個動作需要留意，但先簡單講一講背景。我哋現時嘅金融體系，主要蛻變自七十年代布雷頓森林體系後。美國越戰後赤字頂唔順，美元同黃金脫鈎，Milton Friedman嘅芝加哥學派成主流，可以話貨幣政策打開咗印銀紙大門，此為第一階段。
及後美國財金政策在此基礎上演化出控制價、量兩個層次，八十年代McCallum Rule係控制量嘅代表，用一句話概括，就係透過控制基礎貨幣個量嚟影響GDP，此為第二階段。
但印銀紙要有個譜，所以後來美國通過咗預算平衡法案限制政府嘅財政政策，唔可以亂咁嚟。在此背景下，控量變得難搞，於是再演化為控價，乃有Taylor's Rule出現，也就係現時經常會聽到的透過調整利率去影響經濟，此為第三階段。
金融海嘯前，先進國家財金政策以控價為主，金融體系較落後嘅地方會側重控量，中國即屬後者。但金融海嘯後全世界QE，大量銀紙浸到上心口，各國央行都面對一個後遺症，就係舊有嘅貨幣政策管唔到啲錢，例如中國曾出現減息但市場利率不跌反升。並非傳導性慢，而係影子銀行湧現令傳導性失效。此為美國拖延加息之其一原因，聯儲局要確保加息對市場上有確切影響，唔可以出現加咗但市場當你無到。所以2013年末聯儲局開始試新工具，用隔夜逆回購去控制市場嘅短期回購利率。回購要有抵押品，用得最多當然係國債。全世界央行陸續向回購同抵押品方面改革，係現時新方向，此為第四階段。
印度擬黃金貨幣化
所以現時要留意各國對抵押、回購動作的改革。最近有兩件事，一為印度準備將黃金貨幣化，二為中國地方債問題。各國情況唔同，印度嘅特色係舉國上下存有大量黃金，要搵一啲嘢嚟抵押衍生出印銀紙效果，自然會想到黃金。
據印度《The Economic Times》報道，印度將推出新政，國民可以將屋企嘅黃金存入銀行，銀行會折換成市價存入其戶口而且有息收。是否一種變相政府軟性沒收民間黃金嘅形式？具體細則報道指即將公佈。
中國方面，最近為地方債問題頭痕。如無推斷錯，今次地方債問題係想順水推舟化作流動性高嘅抵押品，改革中國金融市場。現時人行公開市場操作，主要係玩國債同央票，但內地存款性金融機構嘅國債同央票資金池太細，前者約7萬億，後者約7千億，對比中國現時127萬億M2顯得唔對稱，搞得成嘅話亦係一種金融改革。
凡事都有兩面，中國金融制度落後嘅着數之處係好多事可以跟人做，先進國家遇到新問題要解決，條路人哋行晒，有埋驗證，變相中國改革所需時間可以縮短。如果有人同你講嘢時嘅邏輯陳述，係人哋做某樣嘢要一百年，所以我哋都要做一百年，那當然係呃細路。
Mr. Tregunter