上禮拜歐聯首回合，祖記主場對皇馬，開波前又見有巴打網上高呼「馬會派錢」，呢啲當然要八吓，一睇原來講緊皇馬雖然作客，仍有2.35高水，巴打大叫「易啅好分、過關明燈」，之前本欄講過類似嘅留言小心有伏，結果……希望冇乜人瞓身啦吓。皇馬fan屎仲有希望嘅，且看今個禮拜會唔會主場怒劈祖記大手交易。
另一邊巴塞拜仁，相信大家三更半夜都睇到鬼殺咁嘈，皆因球王美斯以君臨之勢，主場盡欺拜仁，三粒袋住呢個關口實在好戲碼，皆因後晚到拜仁主場，隨時半場已經大手交收。唔信可以參考吓波圖，當日作客被拜仁鋤到嘔凸。
好巧合，早幾日去會展嘅食品展，發現有參展酒商賣一支「拜仁餐酒」（圖），樽身設計一紅一白，唔透明，加埋logo簡單搶眼。一問之下，原來係德國酒廠J.OPPMANN做嘅特別版，香港仲未有得賣住，小弟試咗兩啖，當然冇法國嘢咁複雜，但都飲得吓嘅，有興趣朋友自己上網搵J.OPPMANN，你會見到全部德文，想入貨可以搵吓德國朋友幫手，拜仁fan屎買定半箱收藏等小鳳姐都過癮。再問酒商，原來嚟緊多蒙特都準備出酒，我腦內即刻有個蜜蜂色design出咗嚟。當日酒商唔知係咪飲大咗，佢話曼聯都同呢間廠傾緊出紀念酒，我對呢樣有多少保留。曼聯咁大個「鵰」，應該係同國際級香檳王國之類聯乘啩。
梁栢堅
填詞人+彩池人