五一假期，本留在屋企休息，點知放假前收到新亞大師兄T來電，要在五月一日到山光道馬會幸運閣與日本賓架H吃午飯。十幾年前師兄T介紹當時駐港做店長嘅賓架H相識，之後年年食一次飯，賓架H後來奉調回東京，愈升愈高級，成為國營機構營運總裁，每年來港訪問一次，每次由師兄T安排吃飯。
既然如此，點可以拒絕，於是放假之日，十一時許就駕車直奔山光道，賓架H別來無恙，精神飽滿，佢話：「抱歉，要在假期搵你出嚟，不過我下午兩點幾就要去機場搭飛機返東京，只有呢兩個鐘頭有空。」冇所謂之至，問佢近況如何，原來佢已在去年底退休，即刻受聘為京都大學兼任商科教授及某大銀行高級顧問，該銀行在香港有分店、有投資，有本港銀行嘅股權，佢今次來港就係到銀行有投資之事業公司行一行。行一行就係客氣啫，去摸吓底就真啲。
點解賓架H與師兄T咁熟呢，皆因多年前佢地在「稻門會」與「三田會」嘅活動相識，賓架H係慶應校友，師兄T在新亞經濟系畢業後留學早稻田，精通日文。日本社會幾講究門當戶對，私立大學之中以慶應早稻田最有名氣，老早就仿效牛津劍橋划艇賽，每年有「早慶棒球戰」，係兩間大學之每年體育盛事，兩校校友亦在香港有聯誼交流網絡，以前左丁山讀過一本台灣出版之關於日本商社（三井、三菱、住友）嘅書，本書講及日本三大歷史最悠久之商社及關係企業，多由早慶生掌陀，又以慶應生最多，早稻田生更多在傳媒文藝創作界發展，公務員就係東京大學畢業生天下，首相及部長亦多來自呢三間大學，有此背景，賓架H與師兄T惺惺相惜，係好老友嘅。
問賓架H：「日圓如此低，可否挽救經濟？」賓架H話：「救唔救到就未知，但就吸引到大量中國遊客，我在銀座行街周圍聽到普通話，仲以為身處上海。啲中國遊客乜都買，零售店舖食肆非常高興。我前幾日在銀座一宝吃天婦羅（按：中環鴨巴甸街亦有一間一宝，好貴），一宝係有名貴價食店，唔算大，幾乎滿室皆係中國人，有兩個講手機，大聲嘈吵，好冇禮貌，我向店長投訴中國人太大聲，點知店長猛咁向我躹躬道歉，請我忍耐原諒，以免得失中國客人，趕一兩個就驚其他中國食客唔嚟，我唯有苦笑，現在日本係有錢客人大晒！」強國人一打開荷包，所向披靡，歐美日店主紛紛跪低，遲啲不如買起東京銀座區，遍插五星旗啦！