郭能祖籍愛爾蘭，以往長期於英國策騎，同熱愛賽馬之英國皇室有一定淵源。而與英女皇家族有關之香港盃賽，最近畀佢擸晒，繼上個月尾憑「將男」勇奪2000米國際一級賽女皇盃後，郭能這天第八場2400米以「喜蓮歡星」，贏埋本地三級賽皇太后紀念盃，個人歷史性揚威呢項歷史悠久大長途盃賽，揭開從騎新一頁。
「喜蓮歡星」呢匹愛爾蘭自購馬，近四場一級賽全落第後，今次轉戰級數較低之皇太后盃突如其來，在大雨下改變跑法，由後追轉前置，跑落好似識游水曉飛咁，貼欄由頭帶到尾，打開在港勝門。
「喜蓮歡星」贏馬後，由馬主胡家驊太太、86港姐亞軍47歲不老美人吳婉芳主持大局，親自拉頭馬及捧盃。大摩憑「舞林高手」、「喜蓮歡星」包辦第七口孖寶之餘，個人近四季三勝皇太后盃，盃王即係盃王！
今日由第八場開始改掛黏地牌，結果皇太后盃三大熱門「直震撼」、「聰明才智」、「酷男」統統唔入三甲，「喜蓮歡星」爆9.3倍半冷win，擊敗另一美魔女梁芷珊之團體馬「文藝復興」，後駒配楊明綸閘前落重飛，着啡燈8.6倍開跑，不過追足大半條直路都追唔到「喜蓮歡星」只得第二，落飛黨畀場大雨淋瓜咗。三、四名是「極速」及「聰明才智」。