話說韋斯咸領隊肥Sam（艾拿迪斯、左）旁邊，有另一位肥佬名叫麥當勞叔叔，由打橫行嘅保頓時代就已經跟肥Sam搵食。有日教完波，兩條友摸住個肚腩大發偉論。
「阿麥記，教波咁多年，其實今年嘅成績我真係最自豪！」
「唔係嘛肥Sam哥，今年我哋有頭威無尾陣，人人都話我哋上半季攞夠分，下半季收夠籌冇晒火力冇睇頭，咁你都仲話滿意？」
「喂兄弟， 我教咁耐邊隊唔係以護級做目標㗎，我哋上半季達標喎，好肯定係我教波以嚟最早一次，叻過好鬼悶嗰個摩連奴啦，佢都未試過幫球隊護級呀。」
「有道理嘅，之但係你話係最好喎，家陣我哋排中游咋喎。」
「咩中游呀，排第二呀我哋！講緊fair play個排名呀！家陣我哋排第二，第一嘅利物浦實前六名之內完成英超㗎啦，咁個歐霸位仲唔跌落去我哋度！」
「你啱，如果我哋屈到個歐洲賽資格返嚟，都可以話係帶領隊鄉下波衝出國際喎！」
「但其實歐洲賽事小，以我哋咁嘅人腳，成日都打兩round就出局，係叫做有啲嘢畀班成日發夢嘅球迷吹吓肥皂泡囉。」
「仲可以乘機洗吓底，話畀人知你搞波唔係獨沽一味粗枝大葉，隊波係斯文有禮勇而不茅嘅。」
「唓，人哋話我用人一成不變，咁唔通我就場場擺個星期美點陣呀？之但係，萬一有日俾阿摩連奴寸嘴時，我都可以同佢講，我成績低，但品德高，帶波最着重體育精神，第一就如浮雲，虛名嚟嘅箒，型晒。」
「係，不過阿肥Sam哥，我哋家陣並唔係攞硬，因為愛華頓追得好貼，我哋最後兩三場波真係不容有失㗎。」
「易啦，尾二嗰場我哋就係對住拖肥，咁同啲兄弟講明輸贏好閒，最緊要唔好攞牌，保持清白，人哋踢你左腳，就畀埋右腳佢踢，忍一時歐洲在望。」
「但係其實呢個fair play計分，並唔係齋計攞牌，仲要計踢得積唔積極、尊唔尊重對手、尊唔尊重球證、職員態度同球迷表現咁多樣嘢㗎！」
「嘩！複雜過贏波，我平時淨係識叫球員大腳斬同埋哦球證咋喎。」
「我哋整齊嘅制服、友善嘅眼神，大家應該會感受到份誠意嘅。」
KEYMAN
節目主持
電郵：mailto:[email protected]