兩雄相遇，高低立見，但不一定是足球勝負定律，尤其是兩回合比賽，歐聯四強巴塞隆拿（圖）3:0炒拜仁慕尼黑，但為咗入決賽，佢哋一定唔會掉以輕心，所以今晚西甲主場對住皇家蘇斯達，「讓球主客和」開到[-3]咁多，一於要「客勝」。
好多人覺得巴塞周中怒炒拜仁，半隻腳入咗歐聯決賽，美斯表現非常強勁，一個人就奠定勝局，但故事未完，下個禮拜仲有場次回合賽事，今場聯賽點都會留力多少嘅；而皇蘇今年全季只係輸過一次三球以上，主力門將魯利近五場有兩次不失，唔係咁曳，入佢三球？談何容易！
星期日法甲馬賽對摩納哥就要入球「細」，摩納哥踏入2015年經歷咗10場強手對碰，但只有喺歐聯對阿仙奴係贏到3:1，事關紅白軍團教頭渣甸崇尚防守打法，上季佢教士砵亭35場只失25球，今年喺摩納哥已經52場，但都係失32球咋，你話係唔係「細」得有道理呢？
講到道理，今日港超煞科戲安排同時四地開波，原因係季尾降班爭持激烈，但隨住上星期黃大仙大炒澳滌後就肯定咗大埔降班，喺跑馬地撞到行家馬菲爾，佢就搖晒頭話：「領隊，真係唔知波總啲同事點搞，做嘢總係唔識兩手準備嘅，當初佢哋咁諗係好事，但如果一早有埋B計劃咁我哋就唔使咁愁，最後一場比賽隊隊賽後都好似有啲嘢講咁，三頭六臂都死喇！」我對住佢，都唔知可以講咩！
領隊收風
本地職業領隊