周四歐霸盃四強首回合，衞冕嘅西維爾清風送爽，主場3:0大破費倫天拿，躋身決賽高唱入雲。至於兩支意甲球隊除費倫羞家，拿玻里亦唔好得去邊，主場竟然只係同迪尼普踢成1:1，但對方入嗰球明顯越位，難怪拿玻里主席迪羅倫迪斯賽後就發炮，語出驚人話歐洲足協造馬，主席柏天尼已經內定要西維爾贏冠軍，但我求大俠聽完佢啲指控，似係因為贏唔到波唔開心，於是發炮亂噏。
先講西維爾主場對費倫一戰，由阿歷斯維度梅開二度，加上成日扮演後備殺手嘅加美路錦上添花，湊夠三蛋贈畀紫百合，即係話已經九成入決賽。阿歷斯維度賽後亦都牙斬斬，指如果佢話呢場波兩隊好均勢，就係呃大家，但就強調兩回合賽事未完，作客佛羅倫斯要小心。
另一仗，拿玻里雖然全場佔優，但要到下半場早段先由大衛盧比斯施華接應角球頂入，而迪尼普喺完場前10分鐘追和1:1，由沙列斯尼約夫建功，但慢鏡睇到，除咗入波嘅沙列斯尼約夫越位，仲有另一個隊友都企喺越位位置，所以拿玻里和得都幾冤枉。
斥柏天尼為幕後黑手
一向口水多過茶嘅拿玻里主席迪羅倫迪斯，梗係嬲到爆，更將矛頭指向柏天尼，話佢委任咗六個不知所謂嘅球證執法，而個主球證連名都未聽過，所以話係佢一手摧毀場球賽；之後佢越講越誇張，話柏天尼想西維爾奪冠，所以特登造迪尼普入決賽，等西維爾好打啲。我求大俠雖然戥拿玻里有啲唔抵，亦贊成球證抵鬧，但關於造馬嘅指控，就似係呢位主席憑空想像，完全冇證據。講真就算西維爾決賽對住拿玻里，但以今季表現，我都對前者多啲信心。
識睇，一定係睇足英台【英波Live】：
http://soccer.appledaily.com
http://bit.ly/engballlive