德甲尚有三周便煞科，雖說拜仁經已提早封王，來季歐聯席位亦已定，但隨着禾夫斯堡（圖）衝擊歐霸失敗後接連失分，目前這支德甲二哥，僅比四哥利華古遜多四分。若然本周利華古遜能夠擊退三哥慕遜加柏，而禾夫斯堡再有任何差池，要力保前三爭取來季直接躋身歐聯分組賽資格，亦出現一定危機！
自從要分心歐霸對拿玻里的八強大戰，禾夫斯堡在聯賽經已三場不勝，上周一度兩球領先漢諾威而最終被逼和，雖有點托大之嫌，但亦正好警醒了球隊，一日未確定聯賽前三位置，一日都仍有搶分的必要。縱然禾夫斯堡季內戰線繁多，即使歐霸出局後，月底仍有鬥多蒙特的德國盃決賽跟尾，可幸目前卻冇傷冇病，來到季尾仍有充裕人腳予教頭赫京調動，確實是有一點優勢。
禾堡明日作客對柏達邦，後者上周即使勇挫弗賴堡，目前只排尾四，有搶分必要。可是球隊實力有限，加上防守麻麻，若心急搶分而將防線壓前，就正中擅打反擊的禾夫斯堡下懷。以其下半季在主場大敗予利華古遜及拜仁的表現，仍未有足夠本錢，挑戰是時候再發力的禾夫斯堡。
至於德甲三哥爭奪戰由慕遜加柏迎戰利華古遜，前者近九場聯賽取七勝兩和，後者近九場聯賽更取八勝一和，氣勢一時無兩。雖說利華古遜今仗有進攻主力比拿拉比停賽，攻力有一定影響，不過慕遜加柏的後防大將史蘭斯仍舊養傷。以利華許勝不許和的處境，今仗面對強敵，亦肯定要焗攻，雙方炮手雲集，看來是大戰入球肯定不會少！
丘建威
有線足球評述員