噚晚又嚟到一年一度嘅記協籌款晚宴，今次記協請咗份預算案俾立法會拉緊布嘅財爺曾俊華嚟撐場，鬍鬚曾算唔話得啦。鬍鬚曾早排成日講唔好笑嘅爛gag，估唔到噚晚第一次撐記協場就爆seed，嚟個爛gag正gag大放題，不但幾好笑，仲抽盡官場政圈水，絕無冷場。
鬍鬚曾話事前記協提議佢不如彈結他、舞刀弄劍等，點知佢話呢啲嘢都係留番畀個孫睇，「呃吓細路」算，好彩食衞局局長高永文唔在場，唔係唔知會唔會又再情緒失控，叫鬍鬚曾快啲「講完」呢？
認自己喺fb呃like
咁唔表演做乜好呢？鬍鬚曾居然話幫記協做預算案，仲拍心口話憑往績擔保年年有餘，到時連籌款晚宴都可以慳番。哇！咁到時俾人拉布點算？佢跟住即時嚟一記靚抽，話驚咗公民黨毛孟靜同民主黨黃碧雲鬧佢「打壓新聞玩樂自由」，所以都係算嘞！
呢個時候鬍鬚曾又拉埋自己個fb講，好坦白咁承認自己啲post都係呃like，但𠵱家係新媒體年代，佢覺得做官嘅都要諗吓點應對，總之點都好，佢唔會喺放工時間同大家喺fb糾纏喎！呢個時候大家爆笑之餘，仲四圍搵台下聲稱放工都上fb嘅新聞統籌專員馮煒光，想睇睇佢有乜反應。
買咗枱嘅前政務司司長陳方安生，邀請咗美國駐港總領事夏千福同埋歐盟領事，但唔使驚俾人話勾結外國勢力，因為鬍鬚曾都有同佢哋握手。
有財爺撐場，記協今年籌到157.6萬元，都算係唔錯，主席岑倚蘭就送咗三份禮物畀鬍鬚曾，分別係一本記協歷年重要事件照片嘅相簿、有鬍鬚嘅iPad套，同埋寫有「they can't kill us all」嘅袋。
李八方
mailto:[email protected]