何文田味芳餐廳派待用餐早前引起街坊投訴，指有攞餐長者喺對面街嘅樓梯食煙同隨地小便，影響衞生。後來老闆改良派餐方式同地點，暫時平息爭議。附近街坊兼提議派待用餐嘅藝人王喜，噚日幫手洗太平地，清潔樓梯。八方見佢踢拖落街，一手膠桶一手掃把，逐級掃乾淨樓梯，清走煙頭同垃圾，仲用水沖一次。
王喜完工後不忘喺facebook打卡報告，佢話「已經將公公婆婆們曾經留下的痕迹清理乾淨，讓梯級回復本然的面貌。希望曾經受影響的街坊和商㻇，都可以抹去不愉快的經歷，回復本然的心情」。佢又慨嘆清潔街道好辛苦，呼籲大家為工友們着想，愛護環境。八方都落過區聽街坊意見，佢哋都好撐待用餐，派餐之餘兼顧到環境衞生，咁就皆大歡喜啦！