【本報訊】沙田美林邨73歲遛狗翁吳力更慘死一案，警方錯誤拘捕一名自閉症男子，致案件至今懸而未破，吳伯的兒子（圖）昨晚接受《蘋果》記者訪問表示，對真兇仍然逍遙法外感到失望，又指父親日前已經入土為安，生前陪伴父親的愛犬「巴斯」亦交由親戚飼養；盼警方最終可以把真正兇徒繩之於法，還父親一個公道。
小狗交由親戚飼養
吳伯的兒子說：「警方拉錯人，當然係失望啦，對父親過身仲係好痛心；但我唔會怪警方，始終拉犯要一步步嚟，一時心急拉錯人都冇得好講。拉犯係警方責任，希望最終真係天網恢恢！」他又形容：「就算最終捉唔到兇徒，我都相信佢（兇徒）一定有報應。」
吳先生續表示，父親在上月中在美林邨遛狗遇害後，家人已妥善安排其身後事，並剛於本周三（6日）舉殯。雖然家人十分傷心，但父親總算入土為安。他又稱：「其實前兩日都聽到消息，話警方拉錯犯，我都有喺出殯時，將消息話畀爸爸知。」他盼望警方稍後可以把真兇拘捕，屆時他會再到墳前，把消息轉告父親，以慰他在天之靈。
至於吳伯生前心愛的8個月大法國老虎狗「巴斯」，雖然人狗相處已建立了感情，但因受公屋租約限制不可飼養，他被迫把愛犬送到親戚家中飼養。吳先生嘆道：「覺得好唔捨得，不過都唔會諗住攞返嚟養，冇得養都冇辦法！」
■記者黎國剛