Facebook營運總裁Sheryl Sandberg之丈夫Dave Goldberg突然逝世，下筆之時，不知是何原因，五月四日在家全七福與博士B、投資L兩人吃飯，由於佢兩位係矽谷人，消息比較靈通，佢地聽到「沈弼」與「高弼」夫婦與孩子在墨西哥渡假時，女的做按摩，男的跑treadmill，男的突然跑跑吓昏倒，就此魂歸天國。
博士B話人有不同隱性病，運動期間突然昏倒而亡，好多時與心臟血管或腦血管生瘤，忽然爆裂有關，不分老幼年齡（按：前星期一位二十二歲比利時足球員在球場上昏倒沒命），最好驗身時照埋腦袋MRI與心臟照PET Scan，價錢當然要加一大筆。在香港照MRI，一啲都唔平，左丁山十年前就在曼谷驗身時照過，便宜好多，但又未必個個可以照，投資L就話佢試過去照，但一入圓形桶內，就產生phobia（恐懼感），卒之半途而廢。唔講唔知，好多人係忍受唔到將個頭戴上儀器，困在圓形桶狀內成個鐘頭嚟接受MRI掃描嘅，博士B話唔照MRI，好難搵到血管瘤存在與否，因體積好小，搵到就有割除之困難，風險甚高，非用最新儀器和方法不可（即國泰空姐Fanny之故事）。
因博士B要食齋，所有動物都唔食，問佢係唔係有健康理由，佢話唔係，只因佢覺得不合倫理啫！家全七福徐老闆位公子徐德耀醫生係病理學博士，對吃肉亦有戒懼之心，故此特登在「家全七福」推出不少精緻齋菜，呢日左丁山與投資L就食叉燒、乾炒牛河、蝦餃，博士B就食石榴球西蘭花、蔬菜餃、松茸猴頭菇湯、羅漢齋麵，食到佢猛咁叫好，香港啲Veg Food與矽谷有好大分別，梗係啦，廣東人素食，花款多好多嘅。食完爭住埋單，左丁山使出一招「去洗手」，行近洗手間就俾信用咭，點知經理話：「你位朋友L先生早過你到，佢一早交低咗張信用咭在櫃枱」，投資L真係跑慣江湖，居然先下手為強嚟截胡，唔到你唔服。但冇理由㗎，以前去三藩市灣區，食親靚嘢都係投資L付鈔，嚟到香港仲要佢請？一於爭過。點知佢又走出去講咗一輪，經理退回左丁山嘅信用咭，總之係唔夠佢講！佢由IBM電動打字機之Top Sales做到成為華爾街大行經紀，以至今天係矽谷創業投資（生物科技）名人，係有佢一套嘅！