爭位點及保命？睇見李斯特城同阿士東維拉，近期為保命嗰種澎湃嘅戰意，今次重心選同樣有勢嘅「老虎」侯城，喜獲首席射手謝拉域復出候命，如虎添翼，迎戰「降硬」嘅般尼，今場唔贏好危，主W同[-1]兩注出擊。
近期唔少英超強隊戰績失色，唔係好志在排位，第五至第七嘅利物浦、熱刺同修咸頓近六戰同失十分，連一半分數都攞唔到。計前四名，最肉酸係今晚作客水晶宮嘅曼聯，只係冇咗33歲嘅卡域克喺中場做屏障即三連敗，但仲領先利記四分，大家都係剩番三場波；前者要保歐聯席位其實幾穩，何況利記明晚仲要作客車仔。
今晚曼聯對手水晶宮都係三連敗，但上次只係俾「冠軍車」悶親，水兵最值欣賞係前線侵略性強，唔係淨係得七號仔恩歷克波拿斯好波；柏度年初掌帥後，主場贏過熱刺同曼城，中游分子季尾變神經刀係常事，今場博同有接近兩倍嘅入球「大」同水軍[+1]，可起碼立不敗之地。
重心，取上仗主場被「強中強」阿仙奴擊倒嘅侯城。連勝水晶宮同利物浦並錄零失球後，侯城上仗主場無以為繼，全場只有一次中框攻門下，1:3受挫近月歐洲戰績最勁嘅阿仙奴，有先避其鋒之嫌。個別主力遊魂，最具威脅嘅箭頭達美尼度耶形同虛設，一早輸三球，勝在耗力唔多，有利今場打硬仗。
最重要係見到休戰七個多禮拜嘅首席射手謝拉域（圖）喺尾段換入。呢位克羅地亞尖刀，今年缺席「老虎」一半聯賽，仲以八球成為球會首席射手；但呢八個入波為「老虎」喺聯賽錄得五勝二和一負，輸波嗰場要數到去年八月尾負維拉，王牌復出合時咯！對手般尼包尾，空有戰意但冇射手，近六場入球零蛋，「九降」球隊，若鬥志一散，不排除任人魚肉。反而「老虎」尾兩場要對熱刺同曼聯，今場和波，尾三少踢一場嘅黑貓新特蘭隨時追上，重心直取主W；進取者，可取3.5倍[-1]。
守尾門，再取阿仙奴，又係周一波，返主場鬥史雲斯，爭亞軍唔係最重要，但現時球星們爭位上陣激烈；加埋月尾仲要踢英足盃決賽，兵工廠戰意續勝其他成績表版球隊，對手「天鵝」實力唔差，博好分，估主隊贏一球。
波神