今時今日炒股必睇嘅並唔係年報，而係《人民日報》，而家佢嘅評論文章，直頭變成分析報告，一句「牛市也別忘風險」，就好似哈利波特用支魔杖，對住個市講「咄咄失！快啲跌！」就係咁滬綜指就唔見咗4%。
《人民日報》作為中國第一大報，主管單位係中共中央委員會，辦報方向係積極宣傳黨的理論和路線方針政策，積極宣傳中央重大決策部署（下刪數十字），這個來自阿爺嘅friendly reminder，加上傳中證監收緊孖展，成為今次大跌市導火線。
滬綜指由直逼4500點，到昨日險守4100點，散戶自然風聲鶴唳，港人有凌志變三菱，而家大陸有奧迪（Audi）變奧拓（Alto），句子未完，再變奧妙（洗衣粉）。市場甚至有分析師、莊家、散戶的故事，有興趣嘅讀者，可以自己去搜尋一下。講咁多，咁即係點先？滬綜指年頭由2100點水平，一路向北去到調整前先係大約4500水平先至跌，跌完呢幾日，噚日返到4112點。之前升咁多，跌幾百點調整啫，休息只為走更遠的路，喺經濟「下行壓力」情況下，阿爺大把嘢做，點會推冧個市，整個股災出嚟吖，搵自己笨？
流氓