全國人大常委會噚日失驚無神，將《國家安全法》草案二次審議稿，突然上載全國人大網站後，由於稿中有兩處提及香港同澳門，即時引來港澳媒體高度關注。香港人睇見《國家安全法》就諗起23條，聞之色變，估唔到連港府對《國家安全法》都如臨大敵。
話說八方想問問政府有乜反應，咁諗住叫同事問主理內地事務嘅政制及內地事務局，點知即時被該局「轉介」到保安局，指「國家安全」不屬該局政策範圍，係保安局負責喎。到八方同事打去保安局時，保安局就引用1月24日律政司回應國安法嘅公開紀錄，又指事件涉及法律實施問題，將八方同事再「轉介」到律政司，似乎呢啲敏感議題，真係唔多政策局想孭上身囉。