近年本土意識抬頭，被視為定位「大中華」嘅支聯會首當其衝，好似「六四」24周年時，就因為以「愛國愛民，香港精神」為主題而引起軒然大波，本土派呼籲杯葛，最後被迫棄用此口號。今屆支聯會已經特別將主題同雨傘運動連結，仲加插同雨傘運動相關嘅環節，以突出「全民團結」，估唔到今年竟然係因為「建設民主中國」呢個綱領出事，好多支聯會老鬼都話好欷歔。
其實本土派一直都不滿「建設民主中國」呢個支聯會綱領㗎嘞，但支聯會中人都估唔到，最終會發展到本身係支聯會創會成員嘅學聯，都因此而首度與支聯會舉辦嘅悼念六四活動切割，有人話學聯喺退聯潮壓力下，有此決定其實都唔出奇。
當然啦，學生哥話唔同支聯會一齊行動，但都要畀公眾知道佢哋冇放棄追求平反六四㗎，好似較早之前，港大學生會就搶喺支聯會前洗刷國殤之柱，支聯會驚訝之餘都表示「歡迎」，兼夾取消原定嘅洗刷行動，有學聯老鬼口痕話以免大家覺得佢哋好似「爭住拜山」。
而學聯之前都發聲明，提到計劃舉辦另一系列嘅活動悼念六四，花生友聽聞，佢哋想六四前喺銅鑼灣時代廣場舉行集會或音樂會，不過詳情要等城大退聯公投後，先可以敲定。
至於學聯退出後，每年六四維園照到中共政權面目無光嘅燭光，會唔會減少？花生友聽聞支聯會內部評估過，覺得喺咁嘅氣氛下，加上今年係26周年，一定比逢5、逢10嘅紀念之年，人數來得少。
花生友