車路士今季喺英超由頭帶到尾拎冠軍，真係實至名歸，究竟摩連奴可唔可以喺下季繼續威，幫車仔建立一個王朝呢？小弟覺得車仔內有隱憂，外有更強敵手，下季絕對唔會再贏得咁易。
車路士呢季最強嘅地方係防線，今季聯賽失球仲未過30球。比起曼聯、阿仙奴同曼城，車仔勝在後防陣容夠穩定，夾出默契，艾斯派古達、泰利、加利卡希爾同伊雲洛域基本上冇大傷過，佢哋四個今季聯賽正選次數都多過30次，其中年紀最大嘅泰利同伊雲，35場聯賽都正選上陣。
隊長泰利今季仲係穩如泰山，但佢已經34歲，水準好可能突然滑坡，同埋佢近兩季都俾摩連奴用得好盡吓，嗰種日積月累嘅疲倦，話唔定會喺下季爆發。伊雲年紀亦唔細，佢近兩年都一個包辦晒成條右路攻守，但已經開始出現攻得嚟、回防唔切嘅情況。
車仔有隱憂，同時阿仙奴呢兩季慢慢累積力量，下季會成為車仔威脅。阿仙奴近年每季拎幾千萬鎊出嚟買人都冇問題，同埋雲格對陣容嘅加強係循序漸進，例如前季買辛迪卡索拉、上季買奧斯爾、今季買阿歷斯山齊士，大牌逐個嚟，逐一融入。曼聯嚟緊夏天應該又有大動作，相信又要磨合一大輪，穩定性唔夠阿仙奴同車仔嚟。
文：咖喱