車路士悶住贏，終於落實今季英超冠軍，當然引起唔少人「葡萄」，曼城領隊比歷連尼就話藍月入波多，封王嗰屆入過百球，寸車仔唔進取。其實防守足球幾時變成罪？比帥好心你，要90分鐘都守得好絕對唔係符碌。
英國莊家已經列車路士係下季冠軍大熱，誠如咖喱所言，車仔個別位置老化，有一定危機，不過往績上，領隊摩連奴先前喺波圖、車路士同國米都成功連奪聯賽冠軍，係喺皇馬斷纜，信得過。
再睇兵源，因為摩連奴唔鍾意輪換，泰利同杜奧巴等係老化，不過其實車仔之前買落唔少人，𠵱家有22個球員外借咗出去，好似去到費倫嘅穆罕默德沙拿、米堡前鋒班福特，都有出色表現，如果下季重返車仔，隨時好似葛特蘇馬咁，立即成為奇兵。而且本身攻擊線，夏薩特同奧斯卡杜斯山度士全部當打，車仔又大把錢，小弟唔信佢哋會將夏薩特賣去皇馬，基本上泰利嘅中堅位置加多一個後備，已經齊章。
當然車仔冧莊又唔一定十拿九穩，曼聯季季都話億億聲買人，如果今季一個唔好彩又跌出前四，歐霸盃基本放棄，專心聯賽又真係好惡搞。仲有，摩連奴仲未試過幫車仔贏歐聯，算係遺憾，如果下季重歐聯輕英超，都叫做衞冕不利因素。
文：牽牛