騎士周三主場鬥公牛，「大帝」勒邦占士（LeBron James）條招牌頭帶歸位，即刻霸氣攻入33分，帶領球隊大勝106:91，喺呢個東岸準決賽系列，場數追番1:1平手。
事隔接近兩個月終於戴番條頭帶落場，大帝今場即刻生猛晒，連據報順利當選今季「最有進步球員」嘅公牛後衞占美畢拿（Jimmy Butler）都守唔到佢；佢全場就交出33分、八個籃板同五次助攻，以完美表現幫球隊贏波。大帝就自爆，原來呢個係即興決定：「我見條頭帶喺個衣櫃入面，咪試吓戴番囉。」
騎士大前鋒路夫（Kevin Love）做完手術出院後首次亮相，球隊就即刻贏波，但快艇控衞基斯保羅（Chris Paul）就冇咁旺嘞。快艇周三作客火箭，喺比賽當日度過30歲生日嘅CP3繼續因傷缺陣，雖然都有到場支持，可惜球隊最終以109:115反勝為敗，總場數被追和1:1。
壞鐘無阻火箭破「艇」
有見及此，CP3已經嗱嗱聲恢復正式操練，希望周五返到主場嘅Game 3可以趕及復出。（now635台明日10:30am直播）今場仲有個小插曲，第四節一開始大鐘就壞咗，場波暫停成10分鐘，要工作人員臨時搬兩個大計時器放喺兩邊底線（小圖）先可以比賽，老球迷唔知會唔會諗起改建前嘅九龍伊館呢？
