南華「喜」雙飛！南華今季雖然四大皆空，但雨後見彩虹，而且打孖上，除咗前最佳教練米路噚日抵埗，準備第三度「上山」救亡之外，同日出爐嘅香港足球明星選舉網上投票結果，以「票王」保贊為首嘅一眾「少林兵」亦成為大贏家（見附表）。
米路：好鍾意香港嘅生活
曾三奪港甲最佳教練嘅前南華巴西籍主帥米路，盛傳將會接替已「跳船」嘅阿根廷教練馬里奧。佢呢位57歲老人家，噚日終於經杜拜飛抵香港，仲大方證實今次係嚟同「少林寺」研究合作細節。有機會第三度帶領南華嘅米路，噚日見到老友兼前南華副領隊李潤華，即刻好興奮咁相擁，仲話好開心再次返嚟香港︰「我好開心，特別係自己屋企人都好鍾意香港嘅生活，有機會返港執教係期待已久嘅事。」據知，少林寺今次邀請米路嚟港，係希望佢了解球隊狀況，而呢位前巴甲國際體育會助教抵埗後，亦隨即同高層會面，而聽日就會入旺角場睇對東方嘅港超煞科大戰，睇嚟成事機會幾高。
除咗米路之外，南華亦有另一個好消息，就係前晚截止嘅足球明星選舉網上投票，有四名南華球員上榜；當中30歲嘅中堅保贊，仲以2,606票成為「票王」，拋開排第二嘅隊友艾華669票，如無意外會大熱當選最受球迷歡迎球星。雖然今屆選舉嘅球迷投票比重最高（50%），但保贊都仲要過評審委員會（20%）、傳媒機構（20%）同香港體育記者協會（10%）三關，先有機會成為首屆港超足球先生。呢位一向型到爆嘅「塞爾維亞狼人」，就對成為票王處之泰然，「我冇諗過第一季嚟港就有咁多球迷投我票，但我唔會太在意，只會諗點為球隊交出好成績。」
除咗最佳11人外，今季喺仁川亞運表現搶鏡嘅南華防中陳肇鈞，喺最佳青年球員獎項亦以大熱姿態跑出，以2,131票一枝獨秀；而隊友羅港威就暫時以58票之差，不及效力YFC澳滌嘅老友梁冠聰，相信未到今個月18號舉行嘅頒獎典禮，都未知鹿死誰手。
香港排名跌到169位
此外，國際足協周四公佈最新世界排名，香港再跌兩位至169位，追近2012年11月錄得嘅最差世界排名172位紀錄，而中國就續排第82位。至於前列形勢冇改變，頭三名依次序分別係德國、阿根廷及比利時，而英格蘭就排第14位。