近年無綫的劇集，無論口碑和收視都大不如前；反而深宵時段重播23年前舊劇《大時代》卻惹來迴響，還創下近10年深宵時段收視新高。無綫似乎食過翻尋味，打算以89年由周星馳和萬梓良主演的《他來自江湖》緊接《大時代》後播出，並把該時段廣告費增加35%，趁機「搵番筆」。不少網友明言好期待，亦有人揶揄說：「啱啦，重行ATV舊路，歲月留聲。」
曾監製過《壹號皇庭》系列、《妙手仁心》系列等經典劇的鄧特希無限欷歔，昨日在電話中說：「我已經好耐冇留意TVB啲劇，仲有印象係啟華演過嘅……做懲教署（《再戰明天》）同醫生（《On Call 36小時II》）嗰套，因為佢做我望兩眼，但之後都望唔落，因為唔達到自己標準。」他直斥現在的創作人會犯好多低級錯誤：「有啲劇情明明之前睇咗某年某月某日做咗某啲嘢，之後又有個人將之前啲嘢重複話番畀另一個人聽，正常觀眾睇咗，唔需要透過第三者再講一次，睇到好𤷪，明明兩句對白交代咗，點解要重複呢？係一班唔用腦嘅人搞出嚟。」可覺無綫「食老本」加廣告費？他說：「都係睇收視反映出嚟，純粹商業決定。」
大宇：比以前慳皮
「益蟹」陶大宇昨日在灣仔出席有線節目宣傳，可覺劇集新不如舊？他說：「氣候唔同咗，無論資金同人才，𠵱家確係比以前慳皮咗。好多時係一個小生同一個花旦做晒成部劇，唔似以前咁多人去做。只可以咁講，一條橡筋唔可以扯得咁行，唔係話𠵱家唔好睇，咁比較就唔公平。」
採訪、攝影：嵐山、譚倩宜