投資L與博士B與左丁山在灣仔家全七福吃午飯，聽來自Mountain View之博士B講研究開發最新醫療儀器，左丁山聽到一嚿雲，畢竟自己係科學盲，邊識得咁多吖。投資L話：「唔係要你識，係要你知，你識得人多，你把口可以傳開去。醫療儀器大市場在中國大陸，香港賣得幾多吖，所以我地聽日就去內地，與有關人等見面，探吓水溫！」咦，即刻警告佢，中國已調查德國西門子之中國分公司，指西門子中國可能向1000間醫院行賄，博取訂單，西門子就係銷售醫療設備、儀器嘅嘞！
博士B話：「呢啲事我地梗係知所避忌啦，中國國情好複雜，打開市場艱難。派個好老實嘅美國人、德國人去上海北京，一切循規蹈矩，可能用兩年都接唔到一個訂單，會俾總公司炒魷。派個明白花花世界嘅聰明人長駐中國，可能收到訂單源源不絕，總公司領導人笑逐顏開，但一下子就受中國調查、罰款，十年都賺唔番，兼賠上公司聲譽。」
咁就唯有慢慢走，莫亂跑，好彩博士B間公司主力在研究開發，不是銷售，有資格可以慢慢走。既然佢來自Mountain View，索性問吓佢Mountain View市況如何，左丁山在2000年去過一段時間，現在點樣呢？博士B笑曰：「2000年已是上古歷史，那時候Mountain View市民，還不知市內有一間新公司叫做Google，更不識Linkedln為何物，現在呢兩間公司都上咗市，係人都識，僱員個個發達，地產貴到飛起，變到你唔會認得嘅嘞。」新科技發展一日萬里，快到你唔信，領先源頭就如Mountain View、Palo Alto、Cupertino呢啲矽谷小城市，三年一小變，十年一大變，中國與香港如何追得上？真係唔識。博士B教左丁山上YouTube睇VIRF腦血管瘤，可知今天訊息網絡傳遞教育資訊，快到無與倫比。但博士B話：「入到中國大陸，就上唔到Google與YouTube！」中國自己封殺外來網絡，阻礙資訊流通，但又想發展成為科技大國，李克強話要搞互聯網＋，其實幾矛盾。深圳華為係中國科技大公司，與美國Cisco有得撼，市場傳華為之唔上市，皆因該公司內滿是國家機密。但華為嘅首席執行官夠膽說真話，佢指出中國不能樣樣靠國產硬件軟件，而唔用美國軟硬件，因為國產貨更易被人攻破，於國家安全更不利喎！