「政改民意關注組」噚日公佈第5次政改民調，今次問埋受訪者如果2017年有得一人一票選特首，最想邊個成為特首候選人，八方要強調係「候選人」而唔係「參與人」，即係出到閘跑馬仔。
林鄭排第一
率先跑出排第一嘅係好打得嘅局長奶媽、政務司司長林鄭月娥，而俾前特首董建華點名話「反共嘅人出唔到閘」應該「心知肚明」嘅公民黨主席余若薇就排第二。至於早前講過唔排除競逐連任嘅特首梁振英同一直被指係特首「黑馬」嘅立法會主席曾鈺成齊齊排第三。不過，除咗大家估到嘅梁家傑、葉劉淑儀等榜上有名外，天王劉德華同影帝周潤發都係港人之選，分別排11同12位，有1.3%同1.1%支持佢哋，只係僅次唐英年、陳方安生同梁國雄。