要講最多小股東捧場嘅股東會，中電（002）必定數一數二，噚日破紀錄有1,230人出席（一般只係幾十人或幾百人），難怪佢哋要喺理大賽馬會綜藝館搞。
中電小股東嘅提問水平亦唔低，有人就問主席米高嘉道理亞皆老街塊地皮搞緊乜，指塊地曬太陽都曬咗成年，擔心影響中電業績。睇得出佢真心關心中電盤生意，仲要經常巡視業務㖭呀。管理層當然叫佢唔使擔心喇。
中電亦好識做，每年都會設計特別嘅紀念品送畀小股東，今年就有壓縮毛巾同兩罐連泥嘅香草種子，仲有環保袋袋住，認真周到。
有趣嘅係，兩罐香草種子裏面有張說明書，上面有段聲明，講明「中電對產品的質素、標準和效用不會承擔任何保證及保養責任」即係叫小股東種唔出香草都唔好找中電晦氣喇！