特首梁振英喺當地時間周二到訪美國波士頓，一班香港移民連同關注香港民主嘅人士好重視，到場舉黃傘「迎接」。示威者批評政改方案利用提名委員會操控候選人名單，唔係真普選。
聲援港人抗議行動嘅美國民間組織「公民力量」負責人楊建利認為，政府建議嘅特首普選方案，中央可以透過提名委員會控制候選人，幾多人投票已經冇乜意義，咁樣同香港長期以來實行嘅選舉，並無本質上嘅區別。
參觀哈佛幹細胞研究所
獲海外港人撐傘「贈興」嘅CY，無因此影響外訪行程，其間參觀咗哈佛大學幹細胞研究所。政府喺新聞稿話呀，CY此行係參觀研究所嘅實驗室，進一步了解研究所的研究領域，包括再生醫學，就如何合作推動創新科技發展交換意見。有示威者就質疑，CY係為佢專攻幹細胞研究嘅囝囝鋪路喎。