自從3月中離港後，唔少網民都好關心特首梁振英二女梁齊昕（圖）嘅動向，事關齊昕個facebook賬戶閂咗，而instagram亦未報告身在何方。截至噚日，齊昕粉絲報喜，佢喺ig上載機場同扶手電梯圖片，留言「Gotta stop running away like a nomad」（總得停止如游牧民族般遊走），暗示已經返港。
查實齊昕3月中急急離港，事緣佢喺fb留言聲稱被媽媽唐青儀辱罵、掌摑同踢傷，諗過跳樓自殺，仲喺禮賓府報警求助，CY事後首度承認齊昕因為健康同情緒問題一直要睇醫生。
得悉齊昕返港，唔少網民留言話welcome，有人話好掛住佢，叫佢快啲開記招交代近況，亦有人留言：「使唔使同佢申請人身保護令呢？真可憐的孩子！」