八方之前都寫過周融會自掏腰包搞網上媒體「HKG報」，畀多個平台藍絲發聲，以政治評論為主，搵嚟馬恩國等做blogger，又會玩改圖。呢份網報噚日終於面世，八方上網八卦，一開首頁最先見到嘅文章係「壹傳媒盈警有幾大『鑊』？」HKG報對壹傳媒發展咁關心，真係令八方「受寵若驚」！
不過再睇埋其他文章，包括狙擊外訪嘅周永康、「羅37邀（揶揄以37票當選學聯秘書長的羅冠聰）請加拿大插手香港政改」、「泛民正式啟動向民意說不（而泛民明明係話向8.31下篩選方案說不）」。啊，原來呢個就「HKG報」自稱嘅「獨立網媒 為港發聲」。
稱臨老學吹打
周融亦貼文賀baby出世，佢話G代表good甚至great，而自己「臨老學吹打」，源於「黃絲泛民手執多個媒體，擅於宣傳播假，經常把歪理打造為正義行為，影響民心」，作為傳媒老兵，所以要再次下海站起來。但有網民就笑hkgpao音譯「香港豬報」；唔知自稱「妹豬」嘅正義聯盟召集人李偲嫣，幾時加入寫文吖？有口痕友就問嘞，咁呢份網媒嘅社論，係咪叫G點？
識睇睇留言
Amy Moon：HK豬報..??冇鳳姐同鴨仔登廣告，都唔 G 點生存
Warren Tong：佢地（哋）唔搞d花臣野（嘢），又點均（昆）阿爺泵水俾（畀）佢呀
Hero Matsuzaka：首先恭喜周融又搵到名目CAP大陸維穩費！恭喜恭喜
Wingo Chan：G for Garbage.
Michael Chui：發放正能量，業務蒸蒸日上！
資料來源：《蘋果》網頁、「HKG報」fb