亞冠盃F組最後一輪峯迴路轉，賽前同得七分嘅大阪飛腳（藍衫）同武里南聯，周三就分途爭奪出線席位。
飛腳迎戰已出線嘅FC城南，半場落後一球；另一邊廂嘅武里南聯，半場就遙遙領先包尾嘅廣州RF三球；飛腳換邊後嚟料，靠兩位外援安達臣柏德列及連斯利馬各入一球，反勝2:1。
所以就算武里南聯最後主場以5:0狂數富力，都因為三隊同分下對賽最差而出局，而飛腳就係三隊中對賽成績最好，反壓FC城南搶埋首名㖭。
E組方面，兩支爭奪最後一席出線嘅球隊全北汽車同FC山東（魯能），上演生死戰，結果全北汽車最後主場4:1痛擊對方，連續三屆亞冠盃都喺分組賽出線。至於賽前已出線嘅柏雷素爾，雖然最後一場分組賽作客輸畀平陽0:1，仍然保住首名。
亞洲足協亦喺之後公佈咗十六強賽程，兩支日前晉級嘅中超隊FC廣州（廣州恒大）同FC北京（北京國安），分別會對FC城南同全北汽車；至於大阪飛腳，就會同FC首爾爭八強席位。首回合於本月19號展開。
識睇，一定係睇足英台【英波Live】：
http://soccer.appledaily.com
http://bit.ly/engballlive