親政府團體、保衛香港運動成員噚日踩上高院，不滿法院判香港電視司法覆核政府嘅官司勝訴，要求律政司提出上訴。有保衛香港運動成員噚日仲戴上假髮扮法官，再跪低攞住個爛咗嘅「行政主導」示威牌謝罪（圖）。扮演法官嘅成員話，行動係不滿「無良」法官裁決，所以要跪喺度，「自己懲罰自己」，另一成員則邊鬧法官係「狗官」、邊用腳扮踢法官個頭。
唔知係咪行動太過火，發起行動嘅「收工男」傅振中睇見，都叫扮法官嘅成員企返起身，佢聲稱噚日行動只係扮法官，唔係想鬧法官喎。最終律政司派出男職員收信後，傅振中就叫成員調轉示威牌，改到灣仔警總投訴嶺大音樂會早前有樂隊唱粗口歌係「公眾行為不檢」。