A股又出現妖股！從事網絡視頻的暴風科技3月24日上市，首日升44%，之後連續29日升停，打破之前蘭石重裝連續24日升停紀錄，昨日收報157元（人民幣．下同），短短一個多月，已經較招股價7.14元升近22倍！
暴風科技其實喺內地唔算好出名，網民多數睇樂視、優酷、土豆、迅雷等網站。業績亦唔算特別靚仔，去年純利增長只有8.6%。無論係4月24日公佈業績當日，或者禮拜二A股大跌，都無阻暴風科技繼續升停。
點解股價可以咁癲？有分析話，主要係內地網絡公司，除咗樂視網，其他例如騰訊（700）、百度、新浪、土豆等，全部係境外上市，搞到網絡公司喺A股極度渴市。有傳聞話，既然內地可以炒到咁癲，唔少網絡巨頭正密謀搞A股上市。
黃尹華