港女話搵好旅伴難，計費清話搵個好旅伴，不如搵隻好旅行篋。K嘅朋友仔Joey噚日朝坐國泰航班去胡志明市公幹，同行同事唔知搞乜上唔到機，焗住Joey unload番啲行李出嚟，目擊行李被掟到一扑一碌，相當心痛。
#睇到腳仔軟
本身已經好頭痕嘅Joey企喺登機閘口，睇住地勤人員點樣幫佢摷番件行李出嚟，地勤阿哥身手好敏捷，擲壘球嘅姿勢將啲行李一件一件咁掟出嚟，掟得最遠嗰件足足飛越3個行李篋（圖）。
不過親眼睇住自己件行李碌出嚟嘅Joey就難免腳仔軟，事關佢擺咗兩個內藏重要檔案嘅hard disk喺篋裏面，希望冇損毀喇，不過佢話冇怪啲地勤，「無啦啦要個地勤做嘢，難免有情緒，真係辛苦晒佢」。
費清見佢面都青，幫佢打去問吓香港地勤服務公司咩情況，佢哋睇咗Joey段片之後話會同服務供應商了解吓情況，再跟進檢討，乘客需要協助，可以聯絡番佢哋顧客關係部。
其實地勤人員怒掟行李都幾乎係公開秘密，費清有朋友去內地公幹，件行李有兩邊爆開咗，又無時間去買新篋，惟有去到酒店攞兩對紙拖鞋加牛皮膠紙頂住。
＃要生計，也要生活 ＃毋忘初衷
費清