【金鐘】母親節就快到，同樣已為人母嘅前女子組合2R成員黃婉君（Rosanne）同埋名模馬詩慧（Janet），日前分別喺金鐘同中環被拍得同囝囝行街，偷閒享受親子樂。
日前大約下午3時左右，Rosanne同老公及4歲大囝囝Dylan現身金鐘，兩人拖住囝囝逛商場，邊行邊抽起囝囝的手臂扮空中飛人，場面溫馨。Rosanne老公負責孭住兩大袋戰利品，佢自己就全程照顧囝囝，4歲的Dylan非常精靈，而且表情多多，逗得Rosanne開懷甜笑。購物完畢之後，三口子仲去到商場入面嘅戲院買預售戲飛，似乎Rosanne同老公係準備二人世界，之後一行三人再到附近餐廳嘆下午茶，消閒咗大半天。
馬詩慧拖仔衝馬路
【中環→金鐘】至於身為3個仔女嘅媽咪嘅Janet，照顧仔女既勞心又勞力，雖然孻仔王躍穎（Kadin）今年已經16歲，但係Janet依然要做跟得媽咪，帶囝囝去買嘢。日前Janet帶住Kadin由中環買到金鐘，下午3點幾兩人離開置地廣場時，Janet仲拖着囝囝急急腳衝紅燈，跑過馬路趕搭電車，就做咗壞榜樣，罔顧交通安全。之後佢哋去到金鐘落車，入去太古廣場嘅鞋店睇鞋，戴黑超嘅Kadin遺傳咗爸爸王敏德嘅型仔外表，已經長得高過媽咪，他揀鞋時亦乖乖咁聽取媽咪意見，Kadin偏愛灰色同深色系列嘅鞋，最後買咗一對黑色鞋。
採訪、攝影：徐錦池、陳辰
