過去15年，股神畢菲特每年都梗有一日要去紐約曼哈頓嘅Smith & Wollensky扒房食午餐，唔係貪佢好味，而係做善事。
冇錯，一年一度同股神共晉午餐嘅機會，由5月31日開始喺eBay慈善拍賣，下月5日結束，底價2.5萬美金（約19.5萬港元），贏家可以聯同7名友人同股神食個晏，活動收益將全數撥捐畀三藩市Glide基金會。
股神由2000年開始搞午餐拍賣，今年係第16屆，咁多年嚟幫Glide籌到1,780萬美金。當中最貴嘅，就係2012年由匿名人士出資345.68萬美金投得，而步步高創辦人段永平、神州「私募教父」趙丹陽都中過標同股神食飯。
股神認識Glide呢個機構，係因為佢已故妻子Susan喺嗰度做義工。股神話，初時都抱持質疑態度，後來先慢慢了解，仲話Glide令佢明白，無條件嘅愛同埋一啲實際物質幫助，可以改變生命。