踏入5月，自不然就會諗起法國5月藝術節。今年主辦單位喺太古廣場搞咗個「法式鞋藝風靡500年」嘅展覽。話明500年，除咗展出16世紀嘅「古董鞋」之外，仲有個pop-up store賣法國品牌嘅鞋。展覽期至本月24日，免費入場。
有份策展嘅法國鞋業聯盟董事Michelle Bonnet就話，有啲鞋係佢哋由法國嘅博物館借返嚟，有啲就係鞋業聯盟本身買落嘅古董。佢哋希望俾人欣賞古董之餘，都不忘推廣法國鞋業，所以搵咗八個香港冇開舖嘅法國品牌做pop-up store。Michelle希望將相同嘅展品擺去上海搞多次，心水場地之一就係新世界（017）嘅上海K11，唔知集團副主席鄭志剛有冇興趣呢？