長和系世紀大重組已經去到尾聲，有唔少散戶捧場嘅和黃（013）將會成為大家嘅集體回憶，今個月26日收市後會同大家講拜拜，而長和（001）將分拆出嚟嘅長地，上市編號唔會沿用13號仔，噚日有報道話長地嘅上市編號將會係1113。
其實上個月已有行家估長地會用1113嘅編號，無他嘅，皆因同13類似嘅編號，好似113、130、1313全部都已經有上市公司用咗，所以估李嘉誠會為長地揀返個最有13影子嘅上市編號，1113就自然成為唯一選擇。
咁13號仔又會點處置，據講交易所將13號仔留起，等一年後再畀大家申請，各位有意出年上市嘅公司老闆就要留意，申請到13號仔上市編號，對公司知名度肯定有幫助啦。