行會成員陳智思因獲委任「降低食物中鹽和糖委員會」主席而頻頻曝光，佢本身係泰國華僑，八方問佢識講乜泰語，可能因為呢排成日講減鹽減糖，佢第一句就講咗「時腰」，即係豉油。
查實陳智思呢排忙搞「史」，喺佢公司物業搞咗個「今昔．交遞」相片展，展示12張1868年舊香港相片，仲逐一對比𠵱家同一位置情況。佢同展覽搞手歷史遺珍攝影基金會出版人Edward Stokes，噚日特登去到中環閣麟街（圖），𠵱家就有條行人電梯上落啫，1868舊相就睇到兩邊都係民房，山上斜坡筆直，仲係好多石頭。展覽至6月8日止，可到上環禧利街33號永健坊免費參觀。