第三場前五名幾乎平排衝線，到了第四場三班千二米，過終點鏡頭似曾相識，除咗吳廐「金珀龍華」明顯突咗出一條頸位率先衝線，爆15倍冷win完成今季三捷外，二至四名差唔多同一時間壓線，結果貼欄另一冷馬「幾叻仔」第二，最外叠之「信是有緣」跑第三，反為大熱門雷神座騎「綠草如欣」於「金珀龍華」同「信是有緣」中間食三文治，影相跑梗頸四。這場Ｑ派1,418元之多，四重彩13萬元。
「金珀龍華」身價750萬，貴為上季最貴拍賣馬，出道至今四度建功，當中近兩win都由華將爆出10倍或以上冷門，吳定強季內累積贏到12win，只欠三場達標，佢對「金珀龍華」馬主兼深圳龍華鎮首富百億富豪謝國輝可謂交足功課。
至於吳定強徒弟賴維銘，自去年11月12日於谷草勝出「飛翔星」後，事隔接近半年，卒之重返久違之凱旋門，乃騎者季內第三場頭馬。
謝國輝表示愛駒上仗跑包尾，因為心律不正常及喉嚨有毛病，好彩翌日收到吳定強的來電，說馬兒已没有大礙，由於今場排9檔，加上認為「綠草如欣」和「巴基小子」很強勁，因此未敢抱太大信心，是意外驚喜。