雷神第二場做潘頓替工贏「好事必得」，到了第五場四班千二米，他名正言順勝出自己揀騎之蔡廐馬「有心人」，後駒首次出賽排11檔跑谷草，早段墮後冇乜走勢，拉士百幾米卻如狼似虎地撲上，對內側馬匹話過就過，爆出8.8倍半冷win，好有王者風範，毫無疑問大超班，蔡約翰繼剛周日沙田賽事的「澳斯卡」，又一匹插四班自購新馬以驚人姿態即勝。
「有心人」馬主麥鏡開係本地知名測量師，養馬資歷深，當中以1995年遮打盃同「有性格」做平頭冠軍之「開心人」最猛料，今季佢憑「有心人」再戰江湖，結果好運持續，一出即打響頭炮。
今場雷神賽前幫由吳廐轉東廐初出之「帶寶來」試過谷閘冇騎，結果證明佢冇揀錯馬，「帶寶來」用韋達搏盡都係第三，唔能夠轉倉即贏。反而原本訓練「帶寶來」之吳定強，卻憑「勁駿皇駒」影贏「帶寶來」入Q，幫自己出番啖氣。第四名乃後備補出之「天地福星」。