新警隊一哥盧偉聰可謂一鳴驚人，除咗一上任，警隊立即破咗單綁架案，有傳媒介紹一哥上位之路時，連佢細個做班長，都寫成「早已展現領袖風範」，立志當差係因為細個受到《三國演義》啟發，全部寫晒出嚟，結果俾網民瘋傳，盧偉聰即刻成為網上大紅人，不過一哥喺港大嘅舊同學就同八方爆料，話盧偉聰去考警察，絕對唔係受《三國演義》啟發，而係受劉德華啟發先真！
一哥讀港大年代，身為天子門生去做差人唔係冇，不過就唔多囉，八方睇資料，曾經有報道引述盧偉聰解釋，點解佢唔入商界而入警隊，係因為警隊入職人工高喎，但有關報道，八方無法核實有幾堅囉！
亦傳受《三國演義》啟發
至於一哥當差嘅「最新說法」，就話佢立志當差，係因為細個受到《三國演義》啟發，但係有好事之徒引述一哥喺港大嘅舊同學爆料，話呢個講法唔正確，實情係盧偉聰當年喺港大讀書，無綫電視播緊由劉德華做男主角嘅《獵鷹》，劉華角色係一個型仔又有充滿理想嘅大學生，投身警界後仲成為卧底神探。好事之徒話，盧偉聰就係睇咗《獵鷹》，先俾劉華「啟發」，所以先投身警界。
八方翻查《獵鷹》播放日子係1982年，計番個時間，一哥當年廿歲仔，應該真係讀緊HKU，但佢究竟係受劉華定《三國演義》啟發去考警察？怕且要一哥自己親自作答。
李八方
mailto:[email protected]