退休一哥曾偉雄臨走還要點火頭：如果你問綁匪，佢實話警民關係唔好㗎。
原來警視民如匪，但很多投訴警民關係惡劣的市民，從來就不是綁匪，他們很多都是依法享有示威遊行，卻給警察暴力拘控，再有理無理告上法庭，然後證據不足獲釋的「市民」，你卻說他們是綁匪？
我好像沒有到過飛鵝山挖洞。
孟子說：君視臣如土芥，則臣視君如寇讎。即是，你當我唔係人，我都唔當你係生物。警視民如綁匪，則民視警如禿鷹。
最諷刺的是，警匪關係可能較警民關係更好，我特別訪問一位不願透露姓名的匪徒。
「你好，叫我疑犯就OK啦。」
「點睇警匪關係？」「幾好，我覺得好滿意。」
「警察專拉匪徒，點解你會覺得關係好？」「警察對我哋匪徒好好㗎，認人嘅時候，會特登瞇埋眼等市民認唔到人，對我哋有好大保障。」
「咳咳，提提你，瞇埋眼嗰個係警察，唔係匪徒。」「係咩？我以為自己人㖭。仲有啊，為咗怕我哋太容易俾人認出，警察仲好細心，俾我哋戴浴帽同口罩遮住個樣，真係大大增加我哋匪徒甩身嘅機會。警察對我哋無微不至，警匪關係良好。」
「你又唔好誤導匪徒，要視乎你對咩人犯罪。先有咁好待遇。」「所以我會通知兄弟，一旦失手被擒，應該馬上表明身份：我頭先打嗰個係記者嚟㗎，自己人嚟㗎。」
新任一哥盧偉聰的確聰明得多，說不單警民合作，應該是警民一家人。其實警和民從來二而為一，警察脫下制服便是市民，市民明天報考也可以變成警察，就算不想太肉麻做一家人做慈母，也毋須問候老母吧。