新一哥盧偉聰學生時做過班長，獲部份傳媒稱頌，唔少政界人士即刻攞番自己當年由幼稚園到中學時做過嘅職位嚟威番吓。八方噚日見到新一哥前上司、前保安局局長葉劉淑儀，梗係問吓佢嘅「履歷」，原來葉劉當年喺聖士提反女子中學讀Upper Six時，都做過一年Prefect，喺早禱會除咗照顧同學，仲要維持秩序，負責叫啲同學安靜啲，即係「殊」吓人咁啦。
葉劉話一哥做過班長，都對管理警隊有一定幫助，讚佢形象好溫和，相信因為佢做管理出身。葉劉話聽聞新一哥喺法國里昂國際刑警組織秘書處做嘢時好出色，升職極快，勁到國際刑警都唔畀佢走㖭呀。