一直被視為富二、三代從政跳板嘅香港菁英會嚟緊6月會舉行周年大會，選出新一屆執委，現任主席梁宏正「夠鐘」落莊，預料由現任常務副主席、全國政協委員盧文端嘅囝囝盧金榮接任；而澳門賭王何鴻燊四房千金何超盈亦擬參選執委。
讚港青年有思想
菁英會連續幾年同博鰲亞洲論壇合辦「博鰲亞洲青年論壇（香港）」，今年會喺5月20至21日舉行，以「結構變革中的亞洲：青年的前瞻與角色」為題，今年仲新增青年觀察家圓桌，論壇講者亦有唔少猛人，包括阿里巴巴集團副總裁車品覺、泰國前副總理素拉傑等；而超盈就被委以重任，出任論壇籌備委員會聯席主席。
超盈同八方講，自己係90後、啱啱投身社會工作，想多啲參與公共事務，特別關注青年議題，覺得香港青年好有思想，好似之前港大擬推強制學生返內地交流，佢都認為冇得迫喎。