日前曾因入院做手術擊碎腎石，須退下火線導致整個騎師王彩池取消的潘頓，雖然之後已復出贏過馬，但本周三(6日)夜賽又再因身體不適缺陣，其所有座騎已易配。潘頓今朝(5日)有參加試閘，但試完第七組「哈哈笑」，他可能已有不妥，第八組縱無座騎可稍事休息，但第九組「一哥」仍要易配楊明綸。
到了第十組試閘，潘頓夾硬試「友瑩格」並勝出後，似乎又頂唔住，感覺不適，第十一組的「盈利駿馬」楊明綸又做替工出試，而潘頓忍到收操後自行入院，再次接受腎石手術。
由於原由潘頓操刀本周三晚第五場的「醉中意」已退出，故潘頓只有五駒易配，其中第二場「好事必得」改配莫雷拉，戰鬥力可能不減反增。而由於潘頓在受注前已退下火線，騎師王彩池毋須取消，所有易配馬新接手的騎師亦有分數。
至於潘頓是否可在5月9日星期六沙田賽事中宣佈出賽及接受當日的策騎聘約，馬會將於適當時間再作公佈。
二場 好事必得 改配莫雷拉
三場 光速銀桂 改配杜利萊
四場 薑餅人 改配何澤堯
六場 威利大大 改配柏寶
八場 勝飛 改配連達文