馬主旺起上嚟可以好旺，好似季初靚仔馬主王經緯嘅「勁綵」，四日之內連贏兩場。而老牌馬主李福鋆就更旺，養到隻黑衣巨人「步步友」，累積獎金5,233萬，次次出賽好似去銀行提款咁！
不過唔係個個馬主咁好運，有啲黑仔馬主，四日內贏兩場冇佢份，四日內三重打擊卻發生了。所講嘅就係印籍富豪Melwani家族，剛周日佢哋嘅「傑飛」及「盈如奇貓」，賽前都備受睇好，可惜事與願違，「傑飛」起步大脫腳，結果跑尾二大敗，三連捷夢碎。而第二個打擊係在港初出尾三嘅「盈如奇貓」賽後驗出有喘鳴症，搞到班馬主好唔開心，須知「盈如奇貓」乃澳洲二級賽丹山錦標亞軍，評得92分，身價必極昂貴，咁樣喘鳴症搞一搞，前途難免蒙上陰影。
本來班馬主今期(6日)夜馬隻「勝飛」，強配潘頓力求贏馬，希望補番「傑飛」及「盈如奇貓」條數，點知第三個打擊，正正係潘頓突然做手術缺陣，而所有前騎師今場已有座騎，「勝飛」焗住換連達文。大佬呀，大家都知連達文騎功差潘頓幾皮，當然有影響。
不過大家亦要留意，強如冠軍一哩賽亞軍「駿馬名駒」，亦曾係「勝飛」蹄下敗將，今次「勝飛」降回二班跑對手較弱嘅谷草，原本潘頓肯捨棄今場贏過嘅「喜喜寶」及「聰敏不凡」而揀「勝飛」，可見隻馬嘅吸引力，就算家陣用連達文，都不能過份低估。