股評人黃偉康（Andrew）俾證監會釘牌半年！事緣Andrew喺2012年9月14日至10月29日期間，做緊靈獅證券前主席兼行政總裁嗰陣，涉未授權交易，違反《操守準則》，結果由前日起至11月3日唔可以重投業界。佢承認技術上犯錯，但亦出聲明強調自己喺事件冇任何得益。
證監調查發現，Andrew曾以委託形式喺一名客戶嘅賬戶內進行多項交易，但事前冇取得客戶書面授權。證監認為，Andrew令呢位客戶得唔到靈獅證券喺委託賬戶方面所提供嘅保障。
𠵱家係安鑫天瑪仕證券（香港）主席兼行政總裁嘅黃偉康承認，技術上犯錯，雖然跟客戶會面同埋短訊入面有充足指引，但冇有效法律文件，確實係程序上有錯，認同書面文件喺客戶與公司爭拗時好重要。